ع الطريق

في مقولة مشهورة منتشرة بين الأمريكان والناس اللي اتعاملوا معاهم بتقول فيما معناه إن الأمريكان بيحبوا أكلهم وكلابهم وسلاحهم. يمكن الواحد في أول كام أسبوع أو شهر من رحلة لبلد له ثقافة و عادات غير بلده مش بيحس بيها قوي..أو مش بيركز بمعنى أصح ولو ركز بتبقى لإنه سائح وعايز يعرف أكتر عن البلد ويروح يحكي لأهله وصحابه ويأخد التجربة والسلام عليكم ورحمة الله. بعد ما قعدت هنا فترة وعدينا مرحلة الإنكار والكلام اللطيف ده، كنت نازلة الصبح بدري بالعجلة، وفي طريقي كان في مطعم الأكل السريع الأقرب لقلب الأمريكان، ماكدونالدز. طابور العيش اللي كنت بشوفه وأنا رايحة المدرسة في إبتدائي الساعة سابعة الصبح، لقيته في أمريكا قدام ماكدونالدز. مع الوقت عرفت إن ده العادي، الشعب الأمريكي مابيطبخش، بيطبخ في مناسبات أو مرتين في الأسبوع ولا حاجة. هم بياكلوا في البيت نفس عدد المرات اللي الأسرة المصرية بتأكل فيه برا كده.. واحدة من أكتر الحاجات اللي أي جنسية بتضايق منها و بتستنكرها جدا في أمريكا، طريقة أكلهم، خاصة الأوروبيين. التلات وجبات بتوعهم غالبا بيبقى فيهم لحمة، قليل اللي بياكلوا فراخ، في الأغلب خنزير أو دي...