ذكريات

هتبدأ منين ؟..
ناس.. مكان ..صورة قديمة

..ورق ..رسالة ..أغنية..وهكذا
كل الحاجات دي ممكن تكون فيها ذكريات ..

الذكري هي حاجة حصلت زمان ..سواء كانت حلوة أو وحشة
المهم إنها ذكرى ..

ذكريات ممكن تكون بسيطة بس بتفرًحك ..
مكان قديم عيلتك بتتجمع فيه ..أو جواب كان واحد صاحبك كاتبهولك وانتم صغيرين
لما تتفرج على مسرحية أو فيلم قديم إنت بتحبه و كنت بتتفرج عليه وإنت صغير
حاجات بـمجرد ماتفتكرها تلاقي نفسك بـتضحك وإنت مش حاسس

العكس بيحصل ..تفتكر ذكريات تخليك حزين ومتضايق ..
حد عزيز عليك توفى عشت معاه أيام جميلة وغالبا يبقى  جدك أو جدتك
صاحبك اللي سابك و كنتم في يوم بتقولوا على بعض 'BestFriends'
خطوبة اتفشكلت...أيام زمان عامةً ..لما كنت بتبقى حاسس فعلا بالأمان ..
 حاجات تخليك تدًمع..

بس الحقيقة إن الذكريات بتخليك الحالتين في نفس الوقت ..
عشان إنت لما بتفتكر الذكريات الحلوة ..بتبقى مبسوط لما تفتكر اد إيه فرحان ساعتها ..
بس بتزعل جواك ..عشان الوقت ده خلاص ..خلص وبقى ذكرى
بتفرح لما تشوف شكلك في الصورة وإنت صغير وشباب ..عشان ماكنش فيه مسئوليات
وبتزعل لما بتبص في المراية .. وتشوف إنك بقى عندك مليون مسئولية وكبرت من كتر الهموم

ولما بتفتكر اللحظات الصعبة اللي مريت بيها في حياتك ..
تزعل على اد إيه كانت صعبة عليك فراق حد عزيز عليك ..وإنك مش هتشوفه تاني ..
بس تفرح ..لانك عارف إنه ان شاء الله  في مكان أحسن أو لإنه كان بيعاني من مرض وارتاح ..
تزعل على الوقت اللي قضيته مع صاحبك اللي طلع في الآخر مصلحجي
بس تفرح عشان ربنا بينه على حقيقته قدامك ..
..
وفي الآخر كل الحاجات دي بتفضل ذكريات ..
الذكريات  حاجات حلوة ..بس هي زي أي حاجة حلوة .. الكتير منها وحش.
يعني مينفعش نفضل عايشين في الذكريات ..عارف ليه ؟
عشان لو فضلنا عايشين في الذكريات هننسى اللي احنا عايشينه ..
هنتحسر على اللي فات لحد منلاقيش اللي احنا عايشين فيه ..
هنزعل على اللي مات لحد مانلاقي اللي عايشين معانا دلوقتي ماتوا واحنا مش حاسين بيهم ..
وهنضايق على صحابنا اللي سبونا ومش هناخد بالنا من اللي جانبنا..لحد ييجي يوم ويزهقوا ويمشوا ..


اللي أنت عايشه دلوقتي هو ذكريات بكرة ..
فـ متقضيش النهارده وإنت بتتحسر على امبارح ..

حاجة حلوة إنك تفتكر الذكريات ..
حاجة حلوة إنك تفتكر اد إيه أيام زمان كانت أحلى من دلوقتي ..
حاجة حلوة إنك تحس إنك عشت أيام جميلة زمان..
 بس اللي مش حلو إنك تحبس نفسك في الذكريات ديه ..وماتعش غير فيها..
اللي مش حلو إنك تفتكر إن الأيام الحلوة ديه عمر ماهيبقى فيه أحلى منها ..

متخليش الذكريات تشدك .. خليها تدفعك إنك تخلي النهارده أحلى منها ..
افتكر الذكريات بس ماتفضلش عايش فيها ..افتكر الحلو واضحك  وافتكر اللي  بيحزن وعيًط
بس ماتديش للذكريات أكتر من حقها ..

حاول تخلي النهارده احسن من امبارح ..
خليك عارف إن مفيش حاجة بتفضل على حالها .. وإن كل حاجة بتتغير ..
فـ حاول تستمتع بالنهاردة قبل ماهو كمان يتغير ..

قدًر كل حد إنت عارفه .. قدًر كل حاجة معاك دلوقتي
قدًر أوقات الضحك مع اصحابك .. قدًر أوقات المذاكرة عشان لما تكبر هتتمنى إنها ترجع ..
قدًر الحاجات ديه كلها قبل ماتبقى ذكرى ..

اهداء .. إلى بيتنا القديم ..إلى عربيتنا القديمة ..إلى جدتي رحمها الله