سيب حاجة حلوة

عامة كل الناس بتهتم باللي جاي أو باللي هي فيه دلوقتي ..
عشان كده دايما بنسمع "يا ابني بص لقدام " أو "من كتر ما أنت بتبص لبعيد مش شايف اللي تحت رجلك "
بس نادرا مابنسمع "بص للي إنت هتسيبه"..

حتى في التعامل مابين الناس ..بنفكر في دلوقتي ..
بنفكر في اللحظة اللي احنا بنتعامل فيها ..
بنهتم إننا نشوف اللي قدمنا هيعاملنا إزاي .. بنهتم إنه يضحك في وشنا ..
بس مابنهتمش  باللي احنا هنسيبه..مابنهتمش بـ لو سيرتنا اتجابت واحنا مش موجودين ..
يا تري إيه اللي هيتقال؟..

يا تري لما تموت ..الناس هتفتكرك وتدعيلك ..
ولا هتفتكرك ويقولوا  "يلا الله يرحمه بقى " بس مش من نِفسُهم
يا تري  هيفضلوا فاكرينك لحد امتى ؟..


لما حد ييجي يقولك "ربنا يخليك " ..
تفتكر كده ربنا هيطول عمرك ؟..عمر كل واحد مكتوب والكلمة ديه مش معناها إنك تفضل عايش ..
أُمال إيه ؟..
اللي إنت هتسيبه للناس هو ده اللي هيعملك حياة تانية ..
إنك تفضل عايش بـسيرتك بين الناس حتى بعد ماتمشي أو تموت

عشان تخلي الناس فاكراك.. خليك مختلف..
مختلف في حاجة حتى لو كانت بسيطة ..
مختلف في طيبتك .. في تفاؤلك ..في مساعدتك للناس

إنك  تخلي الناس لما حد يسألهم عنك ..
مايبقوش عايزين يسكتوا .. يبقوا بيكلموا كإن كل واحد بيكلم عن نفسه..

إنك تبقى بتعمل أي حاجة وعايز تسيب وراك حاجة جميلة  ..
إنك تسيب في كل خطوة بتعملها حاجة حلوة..
مش لازم مادية .. انطباع حلو ..كلام حلو .. ذكريات حلوة ..
ضحكتك نفسها ممكن الناس تفتكرك بيها ..

إنك تساعد الناس ..انك تحاول فعلا إنك تغير .. تسيب بصمة..
إنك جي الدنيا هنا زيارة .. والزيارة هتنتهي  والله أعلم امتي
بس تفتكر لما تنتهي هتبقى سيبت إيه وراك؟

لما تقابل ناس جديدة وتتكلم معاهم ..تفتكر إنت سيبت إيه ؟..
لما كل يوم تصحى...تفتكر إنت سيبت في يومك إيه؟

اللي إنت هتسيبه ممكن يخلي  ناس إنت متعرفهاش تدعيلك
اللي إنت هتسيبه ممكن يغير حياة ناس كتير
اللي إنت هتسيبه ممكن يجدد الأمل عند ناس الأمل كان خلاص خلص من عندهم
اللي إنت هتسيبه ممكن يخلي الناس -على الاقل- تضحك

والعكس صحيح
إنك ممكن اللي هتسيبه يضايق ناس ويخليهم يدعو عليك -عادي جدا-
ممكن يخلي الناس مش طايقاك وفعلا يرتاحوا لما تموت..

إنت اللي تختار .. فـاختار اللي إنت عايزه ..

في الآخر احب اهدي الكلام  لإتنين ..
فريدة ..
وهي بإختصار بنت معرفهاش عرفتها من تويتر ..كان عندها سرطان و في نفس الوقت كانت في ثانوية عامة
بس كانت متفائلة جدا ..لدرجة إنها كانت بتنقل التفاؤل ده لنا..مع إن المفروض ان احنا اللي ننقلها التفاؤل ..
فريدة ماتت اثر انتشار السرطان في الكبد ..
فريده خلت الناس تعيط وهي مشفتهاش ..خلت الناس عندها امل وهم أصلا مش عارفينها

 شادي الشافعي..مهندس و رئيس مبادرة خطوة لفوق ..
معرفهوش برضه وعرفته من كلام الناس عنه بعد ما توفى في حادثة..
اللي أنا اعرفه إن شادي كان نفسه يغير كل حاجة للأحسن وكان دايما متفائل ..
و اللي أنا شفته إن في ناس كتير جدا زيي مش عارفينه و بـيدعوله عشان عرفوه من كلام صحابه..


الفكرة إن احنا كلنا ماشيين .. فـفكر شوية في اللي إنت هتسيبه..عشان هو ده اللي هيفضل من بعدك
سيب حاجة حلوة  :)