هروب

الهروب مش دايما حاجة وحشة..
ساعات بتحتاج إنك تهرب عشان تبص من بعيد ..
تشوف الحاجات اللي إنت شايفها من مكان تاني ..
أو تشوف إيه اللي هيحصل لما تهرب وتبعد.. إيه اللي هيحصل لو بعدت..
تشوف مين صحابك ومين اللي عارفك مصلحة ..مين هيفتكرك ومين مش هيلاحظ ..كأنك ماكنتش موجود..

ساعات بتحتاج تهرب عشان ترتاح ..
تفضي دماغك من كل المسئوليات والحاجات اللي قلقاك في حياتك ..
ساعات بتحتاج تهرب عشان تكتشف نفسك ..وتشوف في إيه جواها ..
عشان تسأل نفسك السؤال اللي مش بتلاقي وقت تسأله لنفسك ..
 'هو انا عايز إيه؟'..
كنت عايز إيه لما عملت كده؟ .. كانت نيتي إيه لما ضحكت في وش ده؟ ..
عايز إيه من حياتي عامةً ؟..

بتهرب عشان تشوف آخر حاجة وصلتلها كانت إيه ..
بتهرب عشان ترتاح ..تفصل شوية من الحاجات اللي حواليك ..
بتهرب عشان تعيش في عالمك انت اللي انت عامله لنفسك..

مش شرط إنك تهرب إنك تسافر أو تمشي ..اهرب بعقلك ..
اهرب بعيد شوف عقلك حيوديك لحد فين ..

وزي مش دايما بيبقى حاجة وحشه.. ساعات كتير يبقي حاجه وحشة..

إنك تهرب من أول مشكلة أو أي مشكلة تقابلك..فكرك إن الهروب هيحلها..
إنك تهرب لما تفشل..ساعتها ممكن تضيع ألف فرصة عشان تقوم و تكمل ..
إنك تهرب لما تلاقي الناس بعدت عنك ..
بس ماتفكرش إيه ممكن يكون بعدهم عنك.. مش ممكن تكون قاعد معاهم بس هارب في حتة تانية ؟
انك تقرر إنك تهرب على طول ..ومترجعش..
إنك تهرب عشان مش قادر تواجه اللي أنت هربان منه مهما كان ..

بص..
اهرب عشان لما تهرب هترتاح عشان لما تهرب هتتعلم حاجات.. هتشوف حاجات وهتكتشف حاجات..
عشان لما تهرب هتغير حاجات..
 عشان تسيب لنفسك فرصة إنك تفكر .. تاخد قرار..
 عشان تفكر في حل ..عشان توصل للي انت عايزه
 عشان تعرف انت عايز إيه ..


اهرب .. بس قبل ماتهرب فَكر إنك لازم ترجع...
ارجع .. و كمًل اللي انت هربت منه ..
ارجع وخليك اقوى من الأول ..
ساعتها هتعرف إن الهروب مش دايما وحش.