هيً جت عليك
-"يا عم مترميش الكيس في الأرض ما الزبالة هناك اهيه ارميه فيها "
-"يا جدع هي جت عليَّ...ما الناس بترمي في الشارع والبلد كلها زبالة أهو"
-"الإشارة كانت حمرا ..ماوقفتش ليه ؟"
-"هي جت عليَّ ..ماهو كل الناس بتكسر الإشارة..بعدين الشارع كان فاضي ومفيش عربيات اقف ليه؟"
-"ولا .. أنا عندي فكرة كده ممكن تخلي الناس فعلا تتغير وتخلي مصر احسن..تيجي نعملها.."
-"يا عم ما في مليون واحد كان عندهم أفكار قبلنا.. هتيجي علينا احنا و نغير العالم"
كلام بنسمعه كتير ..وساعات احنا نفسنا بنقوله
كل واحد مش مصدق إن هو ممكن يكون بداية إن الناس تقف في الاشاره مثلا..
لو إنت كنت بالعربية والإشارة حمرا ووقفت .. أكيد حد هيقف لما يلاقيك وقفت على الاقل واحد..
طب تخيل معايا كده لو كل واحد بيقول "هي جت عليَّ؟" عمل الحاجة اللي هو بيقول عليها ..
هتلاقي بدل خمسة بيقفوا في الإشارة هتلاقي عشرة..
هتلاقي ناس عايزين يغيروا ويتغيروا
عارف المشكلة إيه؟..
المشكلة إن كل واحد بيتمنى بس مبيعملش ..هتلاقي ناس كتير تقولها طب إنت ليه مابترميش في الزبالة؟
يقلك يا عم إنت فاكرنا اوروبا..ده البلد كلها زباله
تقولوا طب ماتحاول إنت تبدأ بنفسك.. يقولك لأ لما كل الناس تبقى ترمي في الزبالة هابقى ارمي أنا كمان !!
المشكلة إن الحاجات اللي احنا مابنغيرهاش ..
هيجي في يوم وتغيرنا..ويبقى الحاجة ديه عادية بالنسبة لنا حتى لو هي غلط
طب استني .. افرض مرة سافرت بلد بره ..
حترمي في الارض؟ هتكسر إشارة ؟..
ليه مابنفكرش نغير؟ ليه بنقول مستحيل إن مصر تبقى زي اوروبا ولا حتى بعد خمسين سنة ؟
ليه احنا عندنا ناس كتير جدا متفائلة و نفسها فعلا تغير بس مبتعملش حاجة ؟..
ليه مابنبدأش بنفسنا؟..
لما يبقى عندك مشروع وتقول مش هعمله عشان مش هاعرف في مصر وهسافر بره وبتاع..
طب ما تحاول هنا... ماتحاول هنا إنك تعمله ..الحكومة مش هتساعدك ..ساعد نفسك أنت وشوف ممول مثلا..
دور وجرب أكيد هتلاقي طريقة..
عارف إن بيك إنت ممكن كام واحد عنده مشروع أو فكرة ينفذها ..ممكن كام واحد يبدأ..
المشكلة إن كل الناس مستنية حد يبدأ .. ومفيش حد بيبدأ عشان كده ماحدش بيعمل حاجة ..
زي مثلا في المدرسة.. بنقول طب اتكلم وهتلاقيني معاك على طول ..
الناس مستنيين شرارة عشان يبدأوا .. خليك إنت الشرارة ديه ..
فكَّر في الاجابيات ..فكَّر إن أول واحد اخترع العربية مثلا واجه إيه ..
ده مش واجه بلد لأ ده واجه العالم ..إنه يغير تفكيرهم من العربية اللي بـحصان لعربية مابيجرهاش حاجة ..
فكَّر في اللي اخترع النور إنه غير الشمعة لمصباح..فَكر في اللي عمل التيليفون..الخ
الناس دول احسن منك ؟ لأ ..بس هما مقالوش "هي جت علينا؟"
الفكرة إنك تشوف الحاجات اللي ممكن تغيرها ..
وتشوف الحاجات اللي متوفرة..وتغير
عارف لما يبقى حوليك ناس متفائلة وعندها أفكار بجد .. وتتكلموا والحاجات اللي ممكن تعملوها..
حتى لو كانت حاجات مجنونة بس عشان فعلا تغيروا..
هتلاقي إن كل واحد فيكم بيشجع التاني .. هتلاقي جو يخليك متفائل و متحمس
ساعتها هتعرف إن إنت ممكن تغير الغلط ..
ساعتها هتعرف إن مفيش حاجة بتحصل بـسهولة بس إنك تبدأ النهارده أحسن من بكرة ..
ساعتها هـتعرف إن مفيش حاجة اسمها مستحيل ..
وحتى لو إنت مشوفتش التغيير ده هتبقى على الاقل إنت اللي عملت البداية ..
في الآخر عايزة أسألك.. إنت قرأت العنوان إيه؟
قريته على إنه سؤال .. ولا على إنه جملة ..
على العموم في الحالتين مش هتفرق ..لإنه سؤال وإجابته
هيً جت عليك؟
أيوه...هي جت عليك.
"The Ones who are crazy enough to think that they can change the world ,
are the ones who do "
واو فعلاااااااااا ,, شابوووووووووووووووووووو :) :)
ردحذفربنا يخليكي حبيبتي ;)
حذف