واحد سمع

مش هقولك ربنا خلق لك أذنين عشان تسمع أكتر ماتتكلم .. ومش هقولك إذا كان الكلام من فضة فالسكوت من دهب ..
أنا هحكيلك قصة سمعتها من كام يوم ..

شاب اسمه جون ..بيبع عصير للسائحين في جزيرة وكل مايبيع لحد عصير يسأله "مبسوط في المكان اللي أنت نازل  فيه ؟"
ويسمع ردهم ..
فيه اللي يقول له "لأ عشان الملايات مش نظيفة " واللي يقول له "لأ عشان الأكل مش كويس " "لأ عشان الخدمة مش حلوة "واللي يقول  "أيوه مبسوط و اكتر حاجة عجباني موقعه "  وهكذا ..

بدأ جون يكبر شغله وعمل محل عصير .. و برضه يسأل السائحين "مبسوطين؟"
وكان بيكتب الكلام اللي بيسمعه من السائحين ..سواء كان حلو أو وحش
 بعد سنين كبر جون الشغل أكتر وفتح مطعم .. وبرضه كان بيعمل نفس الكلام .. ويكتب اللي بيسمعه

عارف مين جون ده ؟
ده جون ماريوت ( John marriott ) ..   صاحب الفنادق الشهيرة في العالم  ..فنادق ماريوت
بدأ وهو شاب يسأل الناس عشان كان حلمه إنه يعمل احسن فنادق ..
بعد ماعمل المطعم وكسب فلوس اكتر بدأ يفكر في الفنادق اللي بيحلم بيها ..
وبدأ بفندق .. كان صغير بس كان مختلف .. ليه ؟
عشان هو سمع كل الحاجات اللي كانت بتضايق الناس و معملهاش ..عشان كده نجح جون ..عشان سمع..

إنك تسمع من الناس ديه حاجة ممكن  تساعدك كتير في حاجات إنت لسة مشفتهاش بس غيرك شافها ..
ماشي ممكن حاجات مش هتتعلمها الا لما تعملها أو تعدي عليك ..
بس إنك تسمع .. ديه حاجة مهمة قوي

اتعود تسمع من الناس .. عشان هيقولولك حاجات هتفيدك في درستك وفي شغلك في حياتك عامة
 إنك تسمع من الناس الكبار طبعا حاجة مهمة .. عشان هم أكيد مروا بتجارب كتير إنت متعرفهاش ..
بتبقى زهقان وإنت قاعد معاهم وبتسمعهم وهم بيتكلموا؟ هتفتكرهم في يوم لما تتحط في موقف قالولك عليه ..
هم آه مش نفس جيلك و إنت جيل التطور والتكنولوجيا .. بس فيه حاجات مش هينفع الكمبيوتر يقولها لك

إن حد قدك أو اصغر منك ييجي يقولك حاجة مش معناها إنك ماتسمعوش
يمكن هو قاري أو سامع أكتر منك ..

اسمع من الناس .. بس ماتخليهمش يسيطروا على حياتك
اسمع من الناس .. ومتنساش توزن الكلام اللي إنت سمعته
اسمع من الناس  .. عشان تبقى كأنك عشت حكايتهم
اسمع من الناس .. عشان تعرف إيه اللي بيضايقهم وماتعملهوش -أو تعمله على حسب يعني ^_^-

اسمع لعلك تستفيد