صحاب من نوع تاني

عارف الصاحب اللي يبقى دايما جنبك لما تبقى محتاجله ؟
عارف الصاحب اللي إنت تختاره ؟
عارف الصاحب اللي مهما سبته أو فضلت متكلموش فترة وبعدين ترجعله عمره ماهيزعل ؟
عارف الصاحب اللي يخليك تعيط ويخليك تضحك ؟
عارف الصاحب اللي يتكلم وقت ما أنت عايز ويسكت وقت ما أنت عايز ؟
عارف الصاحب اللي لما تقعد معاه تحس إن إنت في عالم تاني .. بيخليك تفصل عن العالم اللي انت فيه ؟

طب عارف بقى الصاحب اللي فيه كل الكلام اللي فوق ده ؟

الكتاب ..
إنك تجيب كتاب إنت تختاره ..عن أي حاجة انت بتحبها..
من اللحظة اللي بتجيب فيها الكتاب بقى الكتاب ده صاحبك
بتبص على الكتاب وتفكر يا تري الكتاب ده حلو ؟..يا تري هكمله لحد الآخر ولا هزهق في النص ؟
بس مش هتعرف  اجابة الاسئلة ديه غير لما تبدا تقرأ فيه .. عمرك ماهتعرف
عشان الغلاف مش هيبين لك اللي جوه الكتاب ..
الكتاب هو صاحبك اللي هيديك حاجات وعمره ماهيسألك على حاجة في المقابل..
انت لما تقرا كتاب و تخلصه مش هتبقى نفس الشخص اللي بدأه..
هتكسب حاجات كتير من الكتاب ده ..

الكتاب هو اللي لما تبقى قاعد معاه مش هيتكلم كتير و يصدعك
هيتكلم زي ما أنت عايز ..لما تفتحه هيتكلم ولما تقفله مش هيزعل ..

الكتاب ممكن يخليك تلف العالم كله وإنت قاعد في مكانك ..
هو اللي بيخليك تعيش حياة تانية غير حياتك ..بيعرفك حاجات إنت مش عارفها
ويخليك تتحط في مواقف عمرك ما مريت بيها ..

ممكن تقرا كتاب و ماتكملوش ..
تزهق أو مايعجبكش ..مش مهم ..المهم إنك اتعلمت.. حتى لو كنت بس اتعلمت إيه اللي معجبكش


كل كتاب بتقراه بيخليك تعرف أكتر ..
مش بس معلومات .. مواقف و شخصيات  وتصرفات ...
بيخليك تعرف أماكن وحكايات وأحلام ..
كل كتاب بتقرأه بيخليك تكبر في عين اللي حواليك أكتر..

طب الكتاب اتكلم معاك .. وقالك كل اللي فيه .. عايز انت تحكي ؟
هات ورقه وقلم واكتب كل اللي إنت عايزه  أيوه اكتب كل اللي جواك ..
هتستريح ..و هتتأكد إن الورقه دي عمرها ماهتروح تقول لحد على اللي انت كتبته
اكتب ..هتلاقي الكتابة بتقويك .. وبتعرفك حاجات أنت مش عارفها عن نفسك

القراءة بتخليك إنسان أحسن كتير ..
القراءة هتخلي عقلك أكبر ..هتخليك تتخيل وتحلم
القراءة هتخليك تعرف تتصرف ..هتتصدم من نهايه الكتاب أو هتعجبك ..
هتتعلم إن مش كل حاجة بتمشي زي ما أنت متخيلها ..
لو مش بتقرا ابدا بـحاجات صغيرة ..مقال صغير ..مجلات.. قصص..
ماتقولش مفيش وقت.. قبل ماتنام ..ولو حتى عشر دقايق..هتفرق ..صدقني هتفرق
ولو بتقرا حاول تنوع في الحجات اللي بتقراها..
ماتحبسش نفسك في مجال واحد ..
اقرأ ..استفيد وفيد اللي حواليك..
واكتب وشخبط  وطلع اللي جواك ..
هتعرف قيمة الورق ده سواء كان مليان أو فاضي
الورق المليان هيفيدك والورق الفاضي برضه هيفيدك ..فضفض له مش هيزهق منك ومش هيقولك كفاية ..
بس هيريحك ..

صحابك مفيش غنى عنهم ..وقاعدتكم متتعوضش..
بس الكتاب والورق الفاضي صحاب من نوع تاني .. صحاب عمرك ماهتشك انهم هيسيبوك في يوم ..
عمرك ماهتحس إنك مش واثق فيهم ..لانهم دايما هيبقوا مستنينك ..

هات كتاب أو أي حاجة تقراها ..وأقعد لوحدك ..
قهوة أو شاي ..واقرا ..
هات ورقه .. واكتب وشخبط
يمكن شخبطتك تكون في يوم .. كتاب


اقرأوا يا امة اقرأ.