سعاده

عارف انت لما تكون سبب في ضحكه حد؟ او انك تخلي حد مبسوط .. 

حتي لو كنت عملت حاجه بسيطه..بس تكون عامل الحاجه البسيطه دي علشان تبسط بيها حد بس، مش عشان عايز منه حاجه مثلا..

لما تكون مش مستني حاجه قدام الحاجه اللي انت بتعملها.. 

زي لما تجيب لامك سوداني و انت مروّح ( شايفاكي يا ماما و انتِ بتضحكي) او تغسل لها المواعين او تساعدها منغير ما تبقي عايز منها حاجه ..

يعني مش بتعمل كده مثلا عشان ترضي انها تنزلك خروجه مع صحابك ؛) 

ساعتها هتلاقي في عيونها ضحكه.. 

او زي ما تكلم قرايبك او صحابك اللي مش قريبين منك من غير مناسبه.. 

و انت بتكلمهم هتلاقي في صوتهم فرحه..

و انك معدي جنب عامل النظافه في الشارع تقوله الله ينور (هيفتكرك هتديلوا فلوس بس ما علينا) 

بس لو بصيتله هتلاقي ابتسامه صافيه.. 

هتعرف ساعتها ان السعاده دي بتيجي من ابسط الحاجات و ان انت نفسك هتبقي مبسوط و انت شايف الناس مبسوطه و بتضحك بسببك و خصوصا الناس اللي انت بتحبها.). 

طب انت عارف ان لو انت عملت حاجه تبسط حد ممكن تغير بيها مزاجه اليوم كله؟ او ممكن يكون كان لسه حاجه مضيقاه و انت خففت عليه.. 

او انه كان فعلا محتاج حاجه نفرحه او يحس ان حد مهتم بيه.. 

او خلاص كان هيستسلم في حاجه و انت جيت بالحاجه اللي انت عملتها شجعته انه يكمل.. 

مش لازم ان السعاده تبقي بالفلوس او المباني او الخروجات.. 

ساعات السعاده انك تشوف اللي حواليك مبسوطين.. 

انهم يحسوا انهم ليهم قيمه و ان في حد مهتم بيهم.. 

ارسم الضحكه علي وشوش الناس

و حتي لو بحاجه بسيطه او بكلمه حلوه..