ارقام

مين قال ان اللي عنده عشرين سنه اصغر من اللي عنده اربعين؟ 

اه اصغر جسديا، بس عقليا ممكن يكون اللي عنده عشرين ده شيخ بالنسبه للي عنده اربعين..

لما بتيجي تاخد الدواء او تحط مرهم او كريم او اي حاجه اكيد سمعت كلمه ' مش بكٌتّرُه' دي قبل كده 

يعني مش لو اخدت الدواء ده ١٠ مرات في اليوم هتخف كده بسرعه.. 

لما تبقي عندك صاحب عارفه من كذا سنه و صاحب انت لسه متعرف عليه بقالك كام شهر، مش لازم صحبك اللي بقالوا كتير ده يبقي فهمك اكتر من التاني او يكون انت بتستريحله اكتر من التاني.. 

اه في عِشره و كل حاجه بس ممكن صاحب تتعرف عليه و تحس انك عارفُه اكتر من صحّابك القدام ..

بتاكل كتير و بين الوجبات بس امتي اخر مره كلت فيها بجد؟ امتي اخر مره كنت بتاكل علي مهلك و مش بتكلم حد ولا بتتفرج علي تيليفزيون .. اخر مره فعلا حسيت بطعم الاكل و قدّرته؟ 

قولت كتير انا اسف بس كام مره من دول كان قصدك فعلا انك اسف 

 

بتصحي كل يوم و تقضي يومك بس امتي اخر مره حسيت انك عايش؟

 

الناس بتعد السنين علي ان السنه فيها ٣٦٥ يوم 

بس مابيعدوش همّ عاشوا قد ايه منهم.. 

ممكن انت تبقي عندك ٤٠ سنه بس عِشت سنتين.

و ممكن يبقي عندك ١٥ و عشت ثلاثين.. 

مش مهم كام مره بتخرج 

مش مهم جبت كام في الامتحان(الا في الثانويه العامه في مصر العزيزه)

ولا مهم عندك كام سنه 

الاهم هو كام مره حسيت انك خرجت؟

و انك بتحب الماده اللي انت امتحنتها او حتي مابتحبهاش بس فهمتها عشان المدرس حببك فيها-نادرا- 

و اهم من كل ده كام سنه عشت؟ كام سنه استفدت منها من سنين عمرك اللي عمّال تحتفل انها بتعدي سنه بعد سنه 

متتخدعش و ماتخدعش نفسك بالارقام 

لان همّ لا يزيدوا و لا يقّلو- معنويا- عن مجرد رسوم.