تايم اوت.

كل واحد في حياته بيحتاج فتره راحه او استجمام 

كل سنه او كل شهر 

حتي بتلاقي الناس تطلع اجازه او بيروحوا الساحل او خروجه كل اسبوع يوم الخميس.

كمان لو فكرت هتلاقي ان كل يوم في فتره بتخصصها لراحتك او عشان تستريح ..

كل الناس بتعمل كده عشان ماتتعبش و ماتجهدش نفسها و لأن  إن 'لبدنك عليك حق ' فلازم مهما وراك من شغل و مسؤليات هتريح شويه.. 

و كل واحد بياخد راحه بالطريقه اللي تعجبه.. 

بس الراحه اللي مش ناس كتير بتفكر فيها هي راحه الدماغ و الروح.. 

وعشان مبيفكروش فيها ممكن يكونوا بيخدوا مليون اجازه بس مبيحسوش بالراحه . 

طب ليه؟

عشان اه بيريحوا جسمهم و بيبعدوه عن الشغل و التعب بس مابيبعدوش عقلهم.

عقلهم بيفضل تحت الضغط ده لدرجه انهم مش بيحسوا بالراحه.. 

  

 بعيد بجسمهم بس فكرهم ماتغيرش.. 

عشان كده ممكن تلاقي الانسان ده من كتر الضغط و عدم الراحه روحه اتأثرت ..

مبقاش الشخص الايجابي المبدع بتاع زمان 

بقي علي طول مهموم و مضايق و بيضايق اللي حواليه بعد ما كان بيشجعهم ..

بقي عنده أرق و مش عارف ينام من كتر التفكير و ان دماغه مش سايباه في حاله..

ف ليه متخلش عقلك ياخد اجازه و تسيبه يريح شويه من الضغط و التفكير و الصداع و الترتيب اللي هو علي طول فيه؟ 

ليه متدلعش دماغك و بدل ما تمسك الموبيل تروح تقعد علي البحر ولا في مكان لسه الزحمه و التكنولوجيا مبوظتهوش؟

او مثلا تروح تحضر اوبرا او تقرا كتاب او تعمل حاجه جديده تسمو بعقلك و بروحك..

ده مش معناه ان الواحد لما يخرج يتفسح او يطلع
الساحل خلاص ينسي كل حاجه في حياته و الحاجات اللي وراه تماما .. 

بس جرب انك زي ما بتسيب جسمك ياخد اجازه سيب عقلك كمان ياخد اجازه..

مش حاجه سهله بس مره مع مره هتعرف تسيبه يفكر في اللحظه اللي هو فيها 

هتعرف امتي يخليه يفكر و امتي تخليه يسيبك متفكرش..

خلي عقلك كمان ياخد تايم اوت:)