القفص

السلام عليكم 

انا بكتب دلوقتي و انا مش عارفه هتكلم  علي ايه  و لا الموضوع اصلا اللي بكتب عنه ايه  

بس اهو .. 

في مرحله ما في سن الانسان بيكتشف فيها انه كان في قفص. 

ايون،قفص 

سواء من الناحيه الاجتماعيه بقي ،اقتصاديه ، دراسيه .. علي حسب كل مرحله ليها حاجه 

و بيتهيألي محدش بيوصل انه يخرج من القفص ده في كل حاجه 

لأن محدش بيعرف يعمل كل حاجه

بس ممكن علي الاقل تبقي عارف ان في حاجه برا القفص.. 

ايه  الكلام اللي انا بقوله ده؟ 

بإختصار شديد و من واقع نظرتي المتواضعه ان انت مثلا بتتربي في بيت اهلك .. من البيت للمدرسه للنادي الخ 

لحد ما توصل سن معين 

و تبدأ تطلع عن الجو ده ، جو الناس اللي نوعا ما شبهك في المدرسه و التمرين وفي اغلب الدروس.. 

تبدأ بقي تطلع من القفص ده و تشوف حاجات غريبه و تصدم .. و تحس انك كأنك حيوان اليف و هربت من البيت و خرجت لتلقي قطط الشوارع المتوحشه.. 

 لو بصينا للناحيه  الدراسيه.. هتعرف ان في ورا المدرسه والكورسات و الدروس و الورق اللي بيتصور ليله الامتحان و بيتذاكر و انت علي باب اللجنه حوار و جو تاني خالص .. 

هتلاقي الناس بتروح وورك شوبس (ورش عمل ) *حته انجليزي *و منظمات و بتتعلم الحاجه اللي هي بتحبها، مش حوار ورقه و قلم و اكتب ورايا 

الحكايه ان الناس دي عايزه تتعلم الحاجه اللي هي عايزاها صح، او تعرف عنها اكتر .. 

 هتشوف ان الرياضه مش مجرد تمرين و يلا نخلص و خلاص .. 

ان ممكن رياضه تبقي بالنسبه لحد اسلوب حياه فعلا.. 

انه مينفعش يفتح نت من غير مايدور علي حاجه عن الرياضه دي، يقرا عنها.. 

و اخيرا اخر قفص او سجن اغلبنا بنتحط جواه هو سجن الوقت.. 

'مش فاضي' هي غالبا اكتر كلمه قيلت في تاريخ البشريه ..

مع اننا لو فكرنا شويه مع بعض و شوفنا كده بنعمل ايه في اليوم.. هنشوف كميه التفاهه اللي في الدنيا كلها.. 

ساعتين علي الاقل علي الموبيل 

ساعه نم في التيليفون 

ساعه تليفزيون   

الخ.. 

مبقولش مايبقاش في راحه او انك تنعزل..  

بس بقول ان لما حد بيبقي عايز حاجه بيعملها و بيلاقي لها وقت و بيدور و يعمل كل اللي يقدر عليه عشان يعملها.

معرفش الكلام اللي فوق ده ليه علاقه ببعض ولا لأ 

بس ختاما ، حاول متخليش حياتك عباره عن سجون و سجون و  سجون ..

حاول تطلع من كل سجن حتي لو هتعرف حاجه بسيطه 

و شوف الحاجه اللي انت حاببها و ادخل فيها زي ماانت عايز 

شكرًا للوقت اللي اخذتوه لقراءه ده 

و يا رب اكون مضيعتوش.. 

اهداء الي ابراهيم الفقي -رحمه الله-