ألفين و خمستاشر
و إن لسه في قنوات بتجيب فيلم ٢٠١٢ علي اساس اننا خلاص موتنا في ٢٠١٢
و إن كل سنه بيبقي عندي امتحانات في الوقت ده و مش بعرف اتفرج علي فيلم هوم الون و لا اتفرج علي حنفي و هو بيقول لفؤاد المهندس كل سنة و انت راس يا عمي
في مسرحيه سك علي بناتك
و إن انا لسه مقتنعة إننا في ٢٠١١
و اخيرا و ليس اخرًا
انها السنه العظيمه اللي هدخل فيها ثانويه عامه...
أول كل سنه كنت بقول هعمل لنفسي هدف و اشوف في اخر السنه عملته ولا لأ .. و اشوف نفسي من السنه اللي فاتت اتغيرت في ايه و للاوحش ولا الاحسن
بس السنه دي اكتشفت حاجات تانيه
السنه اللي فاتت هي تقريبا اكتر سنه اتغيرت فيها لحد دلوقتي و بيتهيألي هي غيرت معظم اللي بيقرأوا دلوقتي زيي بالظبط بكل اللي حصل فيها.
محدش يعرف اللي هيحصل الثانيه اللي جايه،
ممكن حاجه تحصل تخلي اقرب ناس ليك مش موجوده
ممكن
حاجه تحصل تغيّر حياتك ١٨٠ درجه
أو
تخليك تعمل أكثر حاجة مكونتش متخيل إنك في يوم تجيلك شجاعة إنك تعملها
و تقرّب من ناس عمرك ما تخيلت إن في يوم هيكونوا صحابك و تبعد عن تانين متخيلتش إن ممكن يوم يعدي من غير ماتتكلموا
عشان كده السنه اللي جايه دي إن شاء الله
قررت ان الدنيا كلها مش هتقف علي حاجه واحده
عشان انت لو استنيت تخلص حاجه بتعملها
عشان تعمل حاجه تانيه هتفضل مش بتتقدم في حياتك.
لو قلت هقعد مع الناس دول بس و فضلت كل نزولاتك و خروجاتك و تيليفوناتك معاهم مش هتستفاد
ايه الجديد؟
مبقولش خليك ندل
بس المقصود إن الحياه قصيره..
الحياه قصيره
انزل و اطلع و جرب و اتبهدل و عيط و اضحك ضحكه من القلب و اعمل حاجات عمرك ما عملتها.
ماتتكسفش ، اه حواليك ناس فاكرهم مش عارفينك او مش حابين اللي بتحبه بس صدقني انت باهرهم.
خلينا نتفاءل إن إن شاء الله ٢٠١٥ تبقي أحسن بكل بلاويها
الله أعلم ايه اللي فيها هيحصل
بس احنا هنبقي اقوي إن شاء الله
أما انا عن نفسي بتمني إن ثانويه عامه تعدي جميله و خفيفه كده (غالبًا هضحك علي نفسي و انا بقرأ الكلام ده السنه اللي جايه)
و إني اعرف اعمل فيها الكلام اللي مكتوب فوق ده
كل سنه و انتم راس :))
الاء
جوليو
يوسف عيد -زكريا الدرديري-
خالد صالح
سعيد صالح
صباح
رحمكم الله و اسكنكم فسيح جناته.
كل سنة وإنتي حلوة يا سلمى :))
ردحذف