انا الولد.

انا الولد 

انا اللي المجتمع المصري مديني كل الرخص اللي مش مهم هي حرام ولا حلال بس المهم متكونش *عيب* 

انا اللي ممكن اكون عندي اخت في نفس سني او حتي اكبر مني و انا برجع من خروجه الساعه ٣ الفجر و هي بترجع عشره.

عشان * نظره المجتمع* 

انا اللي ممكن اقف مع اكلم بنات و اخرج معاهم و اتفسح و اجبلهم هدايا بالشئ الفولاني في عيد ميلادهم 

و في نفس الوقت لو شفت اختي واقفه مع ولد من جوايا هتضايق و هحس انها بتعمل حاجه غلط 

*ده لو مهزأتهاش* 

بخرج و مش لازم اقول رايح فين  انما هي لازم تقول رايحه فين و مع مين و اكلت ايه و دخلت الحمام كام مره.. 

ممكن اسافر و الف الدنيا واروح الساحل مع صحابي نبات بالاسبوع 

انما البنت؟ مع جوزك يا حبيبتي إن شاء الله..

..

انا اللي بخلص اكل و بأنتخ قدام التيليفزيون او في السرير *خصوصا في رمضان* و بسيب امي و اختي يشيلوا الترابيزه و يغسلوا المواعين والخ.. 

عايزين يلحقوا التراويح؟ لا هيلحقوا بعد ما يخلصوا

 .. 

انا اللي اشرب سجاير.. عادي

بنت تشرب سجاير؟ شمال. 

انا اللي بقضي ليله العيد بره و ارجع لاهلي بعد 

الصلاه.

انا اللي معظم المصريين فاكرين اني تقريبا داخل الجنه من غير حساب.

الفكره مش اننا نخلي البنت ترجع الساعه ٣ ولا إن  اهلها ميسألوش رايحه فين و جايه مع مين.. 

الفكره ان احنا بنهتم  بنظره الناس و العادات اللي الناس هي اصلا اللي حطاها و بنعيش اننا نورث الافكار دي لكل الاجيال.. 

اننا بنتكلم عن الدين و رضا ربنا و احنا اصلا بنبص للي يعجب الناس قبل مانبص للي يرضي ربنا 

اللي حرام حرام علي كله و الحلال حلال علي كله.

بص كده لنظرتك للولد و للبنت في الحاجات اللي هم اللي اتنين بيعملوها 

و قبل ما تقول شايف ايه.. خلي بالك من اللي انت شايفه ده حسب الدين ولا حسب *الناس قالت و الناس بتقول و هتقول* 

ايها المجتمع المصري،رفقا بالقوارير.