انا بطّلت.

انا بطلت اشتم

انا بطلت اكل كتير و انا بطلت اثق في الناس بزياده 

بطلت سجاير، مخدرات،شيشه، قهوه

بطلت امسك الموبيل بالساعات

بطلت افكر في السلبيات بس من الحاجات..

فيه مٓثل شعبي بحت بيقول 'بطلنا اللي يعطلنا'

كل شخص فينا علي مدار حياته او علي الاقل في خلال وقت معين  هتلاقيه بيحاول يبطل 

يبطل حاجه انت ممكن تكون شايفها تافهه بس هي كبيره بالنسبه ليه.

زي اللي عايز يبطل يمسك الموبيل بالساعات عشان مش عايز يبقي عبد لجهاز!

ممكن انت تكون شايف دي حاجه سهله 

او الست اللي بتعمل رجيم و عايزه تخس

يمكن بالنسبه لك حاجه تافهه

ولا اللي عايزه تبطل يضَّحَك عليها و اللي عايز يبطل يبقي طيب بزياده

بس الحاجات دي من ظواهرها غير بواطنها،

يمكن اللي عايز يبطل يمسك الموبيل ده بيعمل كده لمجرد انه مش عايز يضيع وقت،ولا عايز يذاكر مثلا لا سمح الله

و اللي عايزه تخس و تبطل البلاوي اللي مليانه دهون و سكر اللي بتاكلها ،دي في دماغها انها بتعمل كده علشان نفسها يبقي شكلها حلو في فستان او بنطلون!

بس بعد كده

لما الولد يقعد يومين تلاته ميمسكش الموبيل 

و لما الست تقعد اسبوع و اسبوعين تاكل باعتدال و بطريقه صحيه.

و الراجل اللي بيحاول يبطل سجاير يلاقي نفسه عدا شهر بعد عذاب انه مشربش فيه سجاره.

لما الناس دي بتلاقي ان الدنيا موقفتش لما بطلوا الحاجات دي

بتلاقي المفهوم اتغير 

و انك مش مجرد بتبطل الحاجه دي عشان وقت و لا فلوس ولا صحه بس.

 

قبل كل ده انت بتبطل عشان نفسك 

انت بتبطل عشان انت تقدر! 

عشان ربنا خلق لنا عقل و خلانا احنا نتحكم فيه مش هو يتحكم فينا

لان الانسان لو عايز حاجه و حطها في دماغه و ركز انه يعملها بإذن الله بيعملها.

فهي فكره انك بتتحدي نفسك.. عشان لما تلاقي نفسك بطلت الحاجه اللي انت مكونتش متخيل يومك هيمشي ازاي من غيرها..

هتكتشف ان مفيش حاجه بتتحكم فيك و انك قادر تخلي حياتك -بإذن الله-زي ما انت عايز

متخليش حاجه تتحكم فيك.

و متسبش حبك لشخص يخليك مش عارف تسيطر علي نفسك.

دماغك بتعتك و انت تقدر تمشيها زي ما انت عايز

بطّل الحاجه اللي انت حاسس انها بتخليك ضعيف قدام نفسك و ركز انك تتعلم ازاي تتحكم في عقلك و تصرفاتك.

ساعتها هتحس اد ايه انك قادر تستخدم النعمه اللي ربنا عطاهالك بالطريقه الصح و ان عمر ما حاجه او حد يعرف يتحكم فيك.

في ذكري سنتين من غير بيبسي و لا شيبسي.

الحمدلله الذي بنعمته تتم الصالحات.