هي كده.

علي طول الناس بتسألني ليه انا موهومه اوي بالسفر و صور المدن و البلاد و اني نفسي الف العالم 

الفكره اني مقتنعه ان احنا مش هنتعلم حاجه لما نقعد عمرنا كله في نفس المكان بنتعامل مع نفس نوعيه الناس بنشوف نفس الحاجات، هي هي التصرفات و الاخلاقيات و الاخبار، حتي الاكل و الشرب هو هو...

و مؤمنه جدا ان ربنا مخلقناش و خلق الكون كله عشان نحبس نفسنا في نفس الاماكن.. 

معرفش ده معتمد علي كوننا مصريين ولا كطبيعه بشر؛بس لو عممنا الموضوع هنلاقي ان تفكيرنا احنا محدود و مقفول 

بمعني اننا في حاجات كتير جدا عاديه و لما بتحصل بنشوف انها حاجه غريبه.

زي انك لو كنت ماشي في الشارع و حد بيديك شيكولاته هتقلق منه او هتقول دي فيها حاجه، او اذا شفت واحد بيساعد واحد تاني انه يشيل له حاجه هتقول عليه مجنون..

ليه؟ لان احنا دماغنا مقفوله علي اللي بنتعلمه،عشان احنا اتعلمنا نحفظ الحاجات و ناخدها كده مسلم بيها زي ما بنسمعها.

اتعلمنا اننا منثقش في اي حد و لا نحسن الظن في حد و نتوقع الاسوء دايما  مع اني مظنش ان اي دين بيدعو لكده مش الاسلام بس..

ده مش معناه برضه اننا اي حد نديله الامان علي طول طبعا بس احنا موضوع الثقه ده مبيجيش في دماغنا من اساسه.. 

 

مبلمش اهلنا،لان هم اتعلموا نفس تعليمنا بس يمكن ظروف المجتمع اللي احنا فيه هي اللي خليتنا كده..

لو رجعنا لموضعنا الاساسي -السفر- 

هقول ان السفر مش حاجه وحشه زي ما ناس كتير بتقول و اول ماتقولها انك مسافر تلاقي علامات الشفقه و الحزن و يبقي ناقص يطلع دولار يديهولك  و انت مسافر.

السفر حلو زي ما التغيير في حياتك وانت في بلدك برضه حلو، انك تنوع و تشوف ناس من مختلف جنسيات و العادات و اللغات ده هيعلمك و يفتح مخك كتير، بس شطارتك انك انت اللي تقرر مين اللي يأثر في شخصيتك.

زي لما تصاحب الكويس و الوحش و المتدين و البيشتم، 

كل واحد منهم هيعلمك حاجه، بس انت اللي بتقرر مين اللي تخليه يسيب حاجه في شخصيتك،مين اللي يأثر عليك و مين لأ.

متقفلش دماغك عن حاجه ممكن تكون بسيطه و سهله بس انت شايفها غلط او غريبه عشان اتعلمتها او حفظتها كده

السفر مش عيب، و انك تختار حياتك و تعاملاتك حتي لو الناس مستغرباها برضه مش عيب. 

ادعولي الف العالم:)) 

"Life is either a daring adventure or nothing at all."