اثبت.

حاجه حلوه جدا انك تبقي عارف نقطه ضعفك، او علي الاقل مابتنكرهاش.

في اي حاجه اكيد كل واحد ليه نقطه ضعف هو عارفها و يا بيحاول يعيش حياته عادي و متعايش مع نقاط ضعفه يا بيتغلب مع الوقت عليها..

في من اللي بيعرف نقطه ضعفه و بيشتغل عليها، بيبعد في فتره عنها ، يعني مثلا السجاير، واحد عايز يبطل سجاير تلاقيه بيبعد في الكام اسبوع تبطيل اللي في الأول عن الناس الي بتشرب ، او الناس اللي هو عارف انها ممكن تعزم عليه بسيجاره و الاماكن اللي هو متعود كان يقعد يدخن مع أصحابه فيها

تلاقيه مثلا ينزل معاه فلوس تكفي بس الغرض اللي نازله، عشان ميسبش لنفسه فرصه يفكر او يبقي عنده قدره يشتري سجاير ..

دا شئ حلو جدا و فكره التخطيط و المحاولات دي كلها تبين ان تغلبك علي نقطه ضعفك تكاد تكون مضمونه بإذن الله..

بس انا مش هتكلم عن الموضوع ده، هتكلم علي الناس التانيه، هتكلم عن الام اللي بتحضر كل اللي ولادها نفسهم فيه و هي بتعمل رجيم مثلا

او اي حد عامةً يبقي بيخسس او حتي قرر انه ياكل صحي و يشوف جاتوه كده شيكولاته سايحه *بتريل* او مكرونه بشاميل بتاعه تيتا دي اللي كلها بلاوي او ..او.. 

و برضه بيثبت و ميضعفش

او اللي بيعيش كل يوم و نقطه ضعفه قدامه بس بيقاوم عشان هو استعان بربنا و قرر كده.

في مقوله في كتاب انجليزي البطل فيه عنده سرطان ،كان علي طول حاطط السيجاره في بقه

لما كانوا بيسألوه ايه ده كان بيقول 

"You put the killing thing right between your teeth, but you never give it the power to do its killing"

"انك تضع الشئ المميت بين اسنانك لكنك لا تعطه القوه لقتلك" 

طبعا الموت كله بقدر الله و دي حاجه مفيهاش كلام 

بس لو نطبق الكلام ده علي اللي بقوله، 

في كل حاجه، مش سجاير و اكل بس، بص علي تهذيب نفسك في كل حاجه حتي لو في كلمه بتقولها ..

انك تثبت لنفسك انك اتغلبت علي الحاجه اللي مخلياك ضعيف او مخلياك مش قادر تتحكم في نفسك قدامها..

او كنت بتعملها كده لحد ما لقيت نفسك اتعودت عليها و مش عارف تبطل 

و تبقي عرفت انك تهذب نفسك و تتحكم فيها 

و انك يبقي عندك اراده و تنمي الاراده دي..

ساعتها هتعرف ان بإذن الله لو حطيت اي حاجه في دماغك هتعرف تعملها ، و اظن مفيش احسن من الاحساس ده. 

هذا المقال مُهدي لواحده من اقوي النساء الاتي عرفتهن ، منال ابو طه ❤️