الشهرة

الشهرة هي مغامرة .. واللي عندهم أمل بس هم اللي بيغامروا..

مش عيب لما يبقى نفسك تبقى مشهور..
كاتب مشهور أو رسام مشهور أو مهندس مشهور  أو ..أو  
 مشهور في الحاجة اللي أنت بتحبها ..
بس العيب إنك تبقى عايز تكون مشهور  عشان  تتكبر علي اللي حواليك و متساعدهمش

مش عيب إنك تبقى عايز تكون مشهور عشان الناس يفتكروك ويعرفوك ..وكمان يدعولك لما تموت ...
بس العيب إنك تفتكر نفسك باقي على طول وتنسي إنك بتحط لمسة غيرك هيجي بعديك يطورها ويمكن يغيرها خالص

مش عيب إنك تبدأ شهرتك بفكرة ..أصل كله بدأ كده .. بدأ من الصفر و من  تحته كمان ..
 بس العيب إنك بعد ماتتشهر ..تنسى الصفر اللي إنت كنت فيه ..

هتلاقي ناس بتشجعك  وناس هتحبطك وناس هتقف تتفرج عليك من بعيد .. عشان لما تنجح يقولك  "أنا كنت حاسس إنه فيه موهبة "

الناس اللي هتشجعك  دول اعرف انهم مليانين امل وانهم في يوم من الأيام كانوا زييك .. أو هم لسة زييك .. جواهم أفكار ونفسهم ينفذوها .. وميعرفوش حاجة اسمها مستحيل ..

الناس اللي هتحبطك .. حول سلبيتهم اجابية ..اكنهم بيتحدوك .. وإنت هتثبت لهم .. إنك ان شاء الله تقدر ..

من الحوارات  اللي فيها احباط  ..
أب وابنه

- بابا 
- نعم يا حبيبي؟ 
- أنا عايز ابقى مشهور 
- مشهور في إيه ؟
- عايز أنمي موهبتي في الرسم وأرسم لوح وابيعها ..والناس تبقى عرفاني بقى وكده
- إنت مش عندك مذاكره ؟ 
- ما أنا هارسم يوم اجازتي عشان لما ييجي الصيف ابيع اللوح 
- طب روح ذاكر ولما ييجي الصيف يحلها ربنا 
-...................

واحد وصحابه
-  أنا في ف بالي اختراع كده تبع الكهرباء .. لو نفذته وبعته للحكومه..هيوفر لمصر  جامد و ممكن كمان بلاد برة تيجي تشتريه و ... 
- إيه يا عم ده ؟ سعد زغلول قاعد معانا ..  هاهاها احلم على قدك يا باشا 

وفيها إيه لما تحلم على قدك ما أنت قدك  كبير ..

لازم تعرف أن الشهره مبتجيش في يوم وليلة ..وإنك هتحاول كتير .. وهـتزهق كتير .. وهتقع كتير .. بس اوعى تبطل تحاول ..
متبقاش عامل زي الناس اللي عايزين  يعدوا من غير مايعملوا حاجة ... اللي أيامهم  كلها زي بعض .. مع إن هم مش ناقصهم حاجة
حتى إنت تبقى حاولت .. متبقاش متشائم .. واعرف إنك هتبقى حاجة في المستقبل ...عارف هتبقى إيه ؟..  هتبقى  "مشهور"