نفسك
- ورانا شغل كتير هنعمل إيه ؟
- نشد حلنا وان شاء الله هنلحق
-بس لازم نسلم الملف ده بلليل و حاسس إننا مش هنلحق
- ياعم ماتقولش كده .. يلا نكمل بس
_________________
لأ الراجل ده مش بيكلم زميله في الشغل ..ده بيكلم نفسه
أيوه بيكلم نفسه .. مش مجنون .. بالعكس ممكن يكون اعقل من ناس كتير مش بتكلم نفسها
في ناس عايشة وعندها خمسين سنة ومش عارفة فيه جواها إيه ..
ليه ؟ هاقولك ليه....
عشان هم عمرهم ما قعدوا مع نفسهم بعد موقف وسألوها اللي هم عملوه صح ولا غلط
عشان عمرهم ما ساعدوا نفسهم
عشان عمرهم ماحبوا نفسهم وعرفوها وعمرهم ماصحبوها
حاجة مهمة إنك تبقى عارف جواك في إيه ..
عشان إنت لما تعرف نفسك هتعرف ممكن تستحمل اد إيه .. هتبقى عارف ممكن تشتغل اد إيه واخرك هيبقى فين
فيها إيه لو جربت تعزم نفسك على الغدا .. أو تجيب لنفسك حاجة كان نفسك فيها كمكافأه لنفسك بعد أسبوع شغل طويل أو أسبوع الامتحانات مثلا
مش عشان إنت وحيد أو عشان مش لاقي حد يعزمك .. بس عشان إنت هتبقى أكتر واحد عارف إنت نفسك في إيه أو إنت تعبت اد إيه.
فيها إيه لو جربت تقف قدام المراية وتكلم نفسك .. وتشوف شكلك .. يا تري نفسك اللي جوه اللي محدش يعرفها غيرك .. راضية عن نفسك اللي بره... اللي كل الناس شايفينها وبيتعاملوا معاها ؟
فيها إيه لو جربت تكتب لنفسك جواب وتفتحه بعد خمس أو عشر سنين .. تكتب لنفسك اللي إنت بتحلم بيه .. وتنسى الجواب .. ولما تفتحه تشوف إنت وصلت للي كنت بتحلم بيه ولا لأ ؟
الفكرة إنك تصاحب نفسك عشان لما كل اللي حواليك يسيبوك .. مش هتلاقي حد يقف جنبك بعد ربنا غير نفسك
الفكرة إنك تعرف تحب نفسك .. بس مش لدرجة الغرور
الفكرة إنك تساعد نفسك بس مش لدرجة إنك تفضلها على غيرك
الفكرة إنك تشجعها وقت ما كل اللي حواليك يحبطوك
الفكرة إنك تتعود إنك تسمع من نفسك وتصبرها وتهون عليها لما يبقى اللي حواليك مش حاسين إنت اد إيه زعلان أو إنت اد إيه تعبت
الفكرة إنك تقعد مع نفسك .. وتعرف في إيه جواها .. يمكن تلاقي حاجات جديدة إنت مش عارفها عنها .
You are amazing Salma..nice topic,nice pic ;)
ردحذفThankss :)
ردحذفماشاء الله سلومه ... اكتر من رائع . .
ردحذفربنا يخليكي يا لوله ;)
حذفراثع يا لومى ما شاء الله .والصور كمان معبرة جدا..... أستمرى
ردحذفربنا يخليكي يا طنط :) ان شاء الله
ردحذفالله ... انتي موهوبة في الكتابة يا سلمي وأسلوبك شيق وجميل ... وبناء علاقة جيدة مع النفس فكرة جميلة ومهمة ربنا يوفقك وفي إنتظار المزيد من تدويناتك
ردحذفشكرا جداا :)
حذفان شاء الله