حاجات صغيرة

حاجات صغيرة قوي ممكن الواحد مايخدش باله منها .. مع إنها مهمة قوي ..
حاجات ممكن تفرق مع ناس كتير حواليك وإنت مش واخد بالك ..
في  حاجات صغيرة  ممكن تخلي واحد يقولك .. إنت أكتر واحد فرحني النهاردة
وفي حاجات تانية ممكن تخلي واحد ينام معيط ..

لو جربت تقول كلمة حلوة لحد .. مش مجاملة أو كدب بس كلمة تبسط بيها اللي  قدامك
زي مثلا لما تبقى عارف إن أمك واقفة في المطبخ من الصبح وإنت جاي من النادي جعان وتلاقي الأكل متحضر ..
جرب تقولها .. إيه الأكل الحلو ده .. تسلم ايديكي يا أمي
صدقني هتفرق معاها كتير

لو جربت تدخل على مراتك ببوكيه ورد من غير مناسبة
بس عشان هي قاعدة طول اليوم في البيت أو شغالة طول النهار ..
هتلاقي فرحة على وشها  يمكن مشفتهاش من زمان

لو قفلت  موبيلك أو  سيبته  عشان إنت عارف إن صاحبك مبيحبش  اللي قاعد معاه يبقى  ماسك الموبيل طول الخروجه
هيحس بإنك مهتم بيه  وهيبقى مبسوط طول الخروجه ويمكن بعديها كمان ..

كل الحاجات الصغيرة ديه ممكن تخلي اللي حوليك مبسوطين  ..
بس عارف إن  ممكن كلمة واحدة  تتقال بهزار  تضايق جدا ..

عارف إنك لو في يوم  عيد ميلاد صاحبك القريب منك مكلمتوش
ممكن ينام معيط فعلا .. مش عشان معندوش غيرك .. لأ عشان إنت فارق معاه و افتكرك نسيته

ممكن حاجة واحدة بس غلط تعملها حتى لو كانت بسيطة .. تخلي اللي حواليك ينسوا  كل الحاجات الصح  اللي عملتها ..

خليك دايما  مفرح  اللي حوليك ..حتى لو بالحاجات الصغيرة ديه
اضحك في وش الناس وإنت نازل شغلك الصبح حتى لو هم مضحكوش

عدي جنب عامل النظافة وقولوا الله ينور
هات علبة عصير اديها لعسكري المرور

حسس اللي حوليك  إنهم  مهمين
و خلي بالك من الحاجات الصغيرة ..
 عشان بتفرق  كتير