طريقه كلام

(تخيل في دماغك الحوارين اللي جايين ..)

الأول إتنين بيتكلموا بعصبية
-مالك يا عم ؟
- مش شايف إن سيادتك اتأخرت وأنا واقف مستنيك!! 
- لأ أنا متأخرتش أنا جاي في معادي!
- يا عم إيه الكدب ده  إنت جي إتنين ونص!! ..إنت هتحور عليَّ ؟
-  بقولك انا جي إتنين! 
- آه أصل أنا أعمى و غبي ومبفهمش في الساعة .. يا عم روح أنا غلطان إني رديت عليك 
_______________________

التاني إتنين بيتكلموا عادي
-مالك يا عم ؟
-مفيش متضايق بس شوية عشان أنت اتأخرت 
-أنا متأخرتش أنا جاي في معادي 
- مش احنا كان معادنا الساعة اتنين برضه؟
-أيوه 
-وإنت جيت الساعة كام ..؟
- ..أصل المواصلات كانت زحمة واللهِ 
- يعني جيت الساعة كام ؟
- إتنين ونص 
- يعني اتأخرت..
- ايوة اتأخرت ..متزعلش مني أنا اسف 
- مفيش مشاكل يا معلم 
__________________________

في الحوارين إتنين صحاب بيتكلموا ..
في الحوار الأول الاتنين  مضايقين من بعض .. وغالبا هيفضلوا كده كام يوم ..
في الحوار التاني الإتنين قضوا يوم عادي ولا كإن  حاجة حصلت ..

الفرق في إيه ؟ .. في الطريقة

طريقة الكلام اللي محدش بياخد باله منها وهو بيتكلم
مع إنها أهم من الكلام نفسه ..

ممكن يكون كلامك صح مية في المية .. بس هيجوا يغلطوك عشان طريقة كلامك
عشان عصبيتيك وإنت بتتكلم اللي همًا كانوا السبب فيها ..
هتيجي بعد كده تقولوا إنت اللي غلطان عشان إنت اتاخرت .. هيقولك شفت إنت كنت بتتكلم إزاي ؟
مع إن هو اللي غلطان في الموضوع من أوله .. بس طريقتك خلتك غلطان ..


ممكن يكون كلامك كله صح .. بس طريقتك تخلي محدش يسمعك  ويهتم بكلامك
وممكن  يكون كلامك غلط وكدب .. بس يتزين  وكام كلمتين حلوين تخلي اللي قدامك يصدقك لأ وكمان عن اقتناع


لما تبقى رايح تطلب حاجة من حد ..سواء اصغر أو أكبر منك ..
بتطلبها بادب وبالراحة و بصوت واطي كده .. تقعد تجمل  الكلام وإنت بتقوله
عشان طريقة كلامك ممكن تكون بتمثل اربعين في المية مثلا من الموافقة .. وعلى حسب طلبك طبعا

حاول وإنت بتتكلم تحافظ  بقدر الامكان  على هدوئك حتى لو إنت متعصب
أيوه هي مش حاجة سهلة خالص ..
بس افتكر إن القوي من تمالك نفسه عند الغضب ..
وافتكر إنك إنت في الآخر اللي هتبقى كسبان ..

حاول في طريقة كلامك إنها تبقى ممتعة .. متبقاش مملة
حاول تعرف تغير طريقة كلامك على حسب كل موقف إنت بتتحط فيه

طريقة كلامك بتأثر جدا في الانطباع الأول اللي الناس بتاخده عنك
طريقة كلامك بتبين للي قدامك إنت بتحبه ولا بتكرهه
طريقة كلامك ممكن تخليك مميز بين الناس
طريقة كلامك ممكن تكبر موضوع أو مشكلة هي أساسا مش موجودة
طريقة كلامك ممكن تخليك تزعل حد منك وتصحى تاني يوم متلاقيهوش ..
طريقة كلامك ممكن تخليك محبوب أو مكروه
طريقة كلامك ممكن تبين قد إيه إنت موهوب

طريقة كلامك مهمة فمتهملهاش
خليك مميز بيها ..حسنها وماتنسهاش