قرار

-هادخل علمي رياضة ولا علمي علوم ..؟
- هادخل كلية إيه ؟
-هاشتغل في شركة إيه ؟
- أسافر ولا لأ ؟

كلها اسئلة محتاجة منك قرار هتاخده .. بس كل قرار لازم هيعدي بـتلات مراحل ..
أول حاجة مرحلة ماقبل القرار ..
تفكير رهيب .. بتفكر وإنت خارج مع عيلتك ومع اصحابك .. بتفكر قبل ما تنام وأول ماتصحى
عمًال بتقلبها في دماغك .. طب أعمل كذا؟.. طب اختار إيه ؟
وممكن تقعد ع الحال ده شهر

بعد كده.. تاخد القرار .. وهي ديه المرحلة التانية ..
إنك تقتنع بالحاجة اللي إنت كنت بتفكر فيها بقالك شهر ..
 تقتنع بالحل اللي إنت حطيته للسؤال اللي كنت بتدورله على إجابة ..

تالت حاجة .. وأهمهم .. الفعل
خلاص فكرت ورتبت .. واخذت القرار .. عملت إيه بقى عشان توصل للي إنت قررته
مثلا إنت قررت إنك عايز تدخل كلية الطب .. تمام ..
عملت إيه بقى ؟.. ذاكرت ؟ ركزت وإنت قاعد في الدرس ؟ صورت ورق ؟ تعبت عشان تدخلها ؟

بص كده ..
الفزورة  ديه كان كاتبها ابراهيم الفقي -رحمه الله -
-كان فيه تلات طيور ع الشجرة .. قرر طائر منهم أن يطير ..فكم  طائر بقى على الشجرة ؟
وكانت الإجابة تلاتة .. عشان مكتوب إن الطائر قرر آه .. بس طار ؟ لأ ..
عشان كده أهم حاجة في القرار الفعل ..

لما تيجي تاخد قرار فكَّر  كويس قوي قبليها ..
فَكر إيه اللي شايفه  كويس ليك في قرارك ..
فكَّر هتفيد الناس باللي إنت هتعملوا ولا لأ
فكَّر إيه اللي ممكن يحصل بعديها ..
فَكر إنت هتقدر تبقى قد قرارك ولا لأ

لوفكرت كويس عمرك ما هتسيب لنفسك فرصة إنك تندم بعد كده

خليك متأكد إن ربنا كاتب اللي هيحصلك ..
خليك على يقين إن ربنا  دايما معاك ..
خليك واثق من نفسك ..

إنك تاخد قرار مش حاجة سهله..
بص مفيش حاجة بتيجي بالسهل..
هتبدأ ..وتفشل وتبدأ تاني ...
مفيش حاجة هتجيلك .. إنت اللي هتروحلها 

خليك مقتنع إنك وإنت بتجرب هتقع كتير في النص .. وديه مش حاجة وحشة ..
بالعكس .. كل مره بتقع أو بتغلط  فيها إنك بتتعلم حاجة جديدة ..
متستسلمش ..

فكَّر ..قرر..افعل ..