مش عادي

ليه بقى عادي ؟
ليه بقى اليوم عادي؟ ..و الحاجات اللي حواليك عادية ؟..وليه الناس بقت عادية ؟

الايام بقت شبه بعض.. روتين ..
كل يوم تصحى تقعد علي النت .. تاكل ..تنزل ..ترجع ..تقعد علي النت تنام ..
وهكذا .. أكيد طبعا مش كل الناس بتعمل كده .. بس هتلاقي اليوم بيتكرر ايا كان اللي إنت بتعمله ..
مفيهوش جديد .. اليوم عادي
...........

بقى عادي إن الناس ترمي في الشارع .. لأ على فكرة مش عادي .. لو إنت شايفه عادي تبقى اتعودت
بقى عادي إنك تلاقي الشباب واقفين يحششوا في الشارع  وإنت ماشي جنبهم عادي ..حصلت معايا ..
بقى عادي إن الابن يعلي صوته على أمه..

الحاجات ديه مش عادية .. بس عشان احنا بنشوفها كتير .. خلاص بقينا نقول عادي ..

الناس بقيت عادية ..
 أول ماحد يتخرج .. يبقى مليان أحلام والطموح ماليه..
وبعد كده يتصدم بالعالم اللي حواليه ..
ويقرر إنه يبقى عادي .. طب فين الأحلام؟ فين المشاريع ؟ فين الكلام اللي كنت بتقوله أيام الكلية وإنك هتبقى مهندس ناجح وتعمل شركة لنفسك وتعمل مشاريع  .. ها فين كل ده ؟ ف الزبالة...
وينتهي بيه الحال .. إنه يبقى سكرتير .. مساعد مهندس .. أو إنه يشتغل في مجال غير دراسته .. ويبقى عادي..
عايز تبقى عادي ؟
.............

عارف عشان اليوم مايبقاش عادي .. اكسر الروتين .. طبعا أنا بتكلم على الأيام اللي احنا فيها ديه -صيف-
يعني .. اقرأ كتب .. انزل الجيم .. روح اتعلم لغة جديدة هتنفعك لما تتخرج  - هو أنا واخد الأجازة عشان اذاكر؟ مش هيبقى زي ما أنت فاكر خد صحابك وروحوا هتلقيه مش ممل ومش هيبقى زي الدراسة خالص- .. روح جمعية خيرية ساعد الناس .. احضر ندوات
دينية أو ندوات تنمية بشرية ..انزل حمام السباحة مع اصحابك في النادي مثلا .. انزل مع ابوك الشغل .. وهكذا ..

بس متروحش مثلا بلاي ستاشن -Play Station - واليوم اللي بعده تروح تقعد ع القهوة وتقول بكسر الروتين...
آه طبعا لازم يبقى فيه ترفيه في النص .. بس حاول معظم الحاجات تبقى مفيدة ليك و للناس اللي حوليك..
.......

حاول قبل ما تقول على حاجة عادي تفكر في حاجة تانية تقولها قبل ماتقول عادي ..
فكر .. هي عادية فعلا ؟
...
وأخيرًا .. إنت..
حاول متبقاش عادي
هتبقى عادي لما الاحلام اللي جواك تموت وتلاقي الأبواب بتتقفل في وشك ..
والبلد .. وعايز أسافر ..واكتئاب وكده ..
متستناش حد ومضيعش فرصة
الجأ لربنا .. ثق فيه وفي  نفسك .. خليك متفائل ..عافر
..
خلي حياتك مش عادية بس في نفس الوقت مفيدة ..
خليك مش عادي بس في نفس الوقت محترم
خليك مش عادي بس في نفس الوقت عاقل
خليك مش عادي واحلم وميهمكش
خليك مش عادي عشان العادي بقى كتير قوي ..

متبقاش عادي ..