مش اسقاط ع المصريين

الكلام المكتوب يعتمد على فهم القارئ و وسع تخيله..

وانا ماشية في الشارع النهارده حاطة السماعات -Hand Free- في شارع من شوارع منطقة معروفة في الإسكندرية عند ميدان معروف برضه
بعدي شارع رايح جي من الشوارع اللي بصة ع الميدان .. عديت الشارع الأول- اللي رايح - ووقفت على الجزيرة عشان اعدي الشارع التاني - اللي جي - .. لقيت عسكري لونه خمري ولابس البدله السوداء ومبتسم للا شيء..
حاطت  السماعات بتاعه الموبيل -Hand free- وعايش في دنيا تانية ..

وانا مركزة مع العسكري .. سمعت صوت فرامل جامدة ..
بصيت عالميدان لقيت إن في تاكسي كان  عايز يدخل من الميدان على الشارع المتفرع منه - اللي أنا لسة معدياه ده - ..
اما التاكسي التاني فـكان عايز يكمل لف الدوران .. بس كان بيلف من آخر حارة برة.. والإتنين زنقوا على بعض وكانوا هيخبطوا ..

موضوع زي ده ممكن يعدي عادي مع كام شتيمة في سر كل سواق منهم ..
بس اللي حصل إن صاحب التاكسي الأول راح ركن  ونزل من العربية ..وصاحبنا العسكري منسجم فيما يسمع..
أنا طبعا كنت مشيت شوية ..بصيت ورا لقيت راح سواق التاكسي التاني كمان نازل ..
والعسكري  لسة واقف مكانه ..
شلت أنا السماعات من ودني .. وسامعة صوت الخناقة طبعا ..
مشيت شوية كمان وبصيت.. لقيت السواق ده وده قدام بعض وخلاص هيضربوا بعض..
والناس كلها ملموين

بصيت ع  العسكري .. هو مات ؟ ماهو يا مات وهو واقف يا مبيشوفش..

مشيت وقلت عليه العوض ومنه العوض ..
هو ده اللي بيحصل .. كل واحد عامل  نفسه مش شايف ..
كل واحد بيروح شغله عشان يحط السماعات..  يفتح Facebook يا ينام
اكتشفت إن العسكري ده هو المصريين ..
في حاجات كتير .. كل حاجة ممكن تطبقها عليه .
تطبق  عليه من الغني للفقير..

تطبق علي اللي ماسك الموبيل طول اليوم للي مش لاقي قوط اليوم..
..
قبل ما أدخل شارع اللي مش بيبص عالميدان .. قلت ابص آخر مرة ..
لقيت العسكري بيشيل السماعات ورايح على السواقين .. اللي كانوا خلاص بيضربوا بعض تقريبا ..
حطيت السماعات ..وضحكت ومشيت ..