ع الطريق

الهروب مش دايما حاجة وحشة.. ساعات بتحتاج إنك تهرب عشان تبص من بعيد .. تشوف الحاجات اللي إنت شايفها من مكان تاني .. أو تشوف إيه اللي هيحصل لما تهرب وتبعد.. إيه اللي هيحصل لو بعدت.. تشوف مين صحابك ومين اللي عارفك مصلحة ..مين هيفتكرك ومين مش هيلاحظ ..كأنك ماكنتش موجود.. ساعات بتحتاج تهرب عشان ترتاح .. تفضي دماغك من كل المسئوليات والحاجات اللي قلقاك في حياتك .. ساعات بتحتاج تهرب عشان تكتشف نفسك ..وتشوف في إيه جواها .. عشان تسأل نفسك السؤال اللي مش بتلاقي وقت تسأله لنفسك ..   'هو انا عايز إيه؟'.. كنت عايز إيه لما عملت كده؟ .. كانت نيتي إيه لما ضحكت في وش ده؟ .. عايز إيه من حياتي عامةً ؟.. بتهرب عشان تشوف آخر حاجة وصلتلها كانت إيه .. بتهرب عشان ترتاح ..تفصل شوية من الحاجات اللي حواليك .. بتهرب عشان تعيش في عالمك انت اللي انت عامله لنفسك.. مش شرط إنك تهرب إنك تسافر أو تمشي ..اهرب بعقلك .. اهرب بعيد شوف عقلك حيوديك لحد فين .. وزي مش دايما بيبقى حاجة وحشه.. ساعات كتير يبقي حاجه وحشة.. إنك تهرب من أول مشكلة أو أي مشكلة تقابلك..فكرك إن الهروب هيحلها.. إنك تهرب...

-"يا عم مترميش الكيس في الأرض ما الزبالة هناك اهيه ارميه فيها " -"يا جدع هي جت عليَّ...ما الناس بترمي في الشارع والبلد كلها زبالة أهو" -"الإشارة كانت حمرا ..ماوقفتش ليه ؟" -"هي جت عليَّ ..ماهو كل الناس بتكسر الإشارة..بعدين الشارع كان فاضي ومفيش عربيات اقف ليه؟" -"ولا .. أنا عندي فكرة كده ممكن تخلي الناس فعلا تتغير وتخلي مصر احسن..تيجي نعملها.." -"يا عم  ما في مليون واحد كان عندهم أفكار قبلنا.. هتيجي علينا احنا و نغير العالم" كلام بنسمعه كتير ..وساعات احنا نفسنا بنقوله كل واحد مش مصدق إن هو ممكن يكون بداية إن الناس تقف في الاشاره مثلا.. لو إنت كنت بالعربية والإشارة حمرا ووقفت .. أكيد حد هيقف لما يلاقيك وقفت على الاقل واحد.. طب تخيل معايا كده لو كل واحد بيقول "هي جت عليَّ؟" عمل الحاجة اللي هو بيقول عليها .. هتلاقي بدل خمسة بيقفوا في الإشارة هتلاقي عشرة.. هتلاقي ناس عايزين يغيروا ويتغيروا عارف المشكلة إيه؟.. المشكلة إن كل واحد بيتمنى بس مبيعملش ..هتلاقي ناس كتير تقولها  طب إنت ليه مابترميش في الزبالة...

عامة كل الناس بتهتم باللي جاي أو باللي هي فيه دلوقتي .. عشان كده دايما بنسمع "يا ابني بص لقدام " أو "من كتر ما أنت بتبص لبعيد مش شايف اللي تحت رجلك " بس نادرا مابنسمع "بص للي إنت هتسيبه".. حتى في التعامل مابين الناس ..بنفكر في دلوقتي .. بنفكر في اللحظة اللي احنا بنتعامل فيها .. بنهتم إننا نشوف اللي قدمنا هيعاملنا إزاي .. بنهتم إنه يضحك في وشنا .. بس مابنهتمش  باللي احنا هنسيبه..مابنهتمش بـ لو سيرتنا اتجابت واحنا مش موجودين .. يا تري إيه اللي هيتقال؟.. يا تري لما تموت ..الناس هتفتكرك وتدعيلك .. ولا هتفتكرك ويقولوا  "يلا الله يرحمه بقى " بس مش من نِفسُهم يا تري  هيفضلوا فاكرينك لحد امتى ؟.. لما حد ييجي يقولك "ربنا يخليك " .. تفتكر كده ربنا هيطول عمرك ؟..عمر كل واحد مكتوب والكلمة ديه مش معناها إنك تفضل عايش .. أُمال إيه ؟.. اللي إنت هتسيبه للناس هو ده اللي هيعملك حياة تانية .. إنك تفضل عايش بـسيرتك بين الناس حتى بعد ماتمشي أو تموت عشان تخلي الناس فاكراك.. خليك مختلف.. مختلف في حاجة حتى لو كانت بسيطة .. مختلف في طيب...

عارف الصاحب اللي يبقى دايما جنبك لما تبقى محتاجله ؟ عارف الصاحب اللي إنت تختاره ؟ عارف الصاحب اللي مهما سبته أو فضلت متكلموش فترة وبعدين ترجعله عمره ماهيزعل ؟ عارف الصاحب اللي يخليك تعيط ويخليك تضحك ؟ عارف الصاحب اللي يتكلم وقت ما أنت عايز ويسكت وقت ما أنت عايز ؟ عارف الصاحب اللي لما تقعد معاه تحس إن إنت في عالم تاني .. بيخليك تفصل عن العالم اللي انت فيه ؟ طب عارف بقى الصاحب اللي فيه كل الكلام اللي فوق ده ؟ الكتاب .. إنك تجيب كتاب إنت تختاره ..عن أي حاجة انت بتحبها.. من اللحظة اللي بتجيب فيها الكتاب بقى الكتاب ده صاحبك بتبص على الكتاب وتفكر يا تري الكتاب ده حلو ؟..يا تري هكمله لحد الآخر ولا هزهق في النص ؟ بس مش هتعرف  اجابة الاسئلة ديه غير لما تبدا تقرأ فيه .. عمرك ماهتعرف عشان الغلاف مش هيبين لك اللي جوه الكتاب .. الكتاب هو صاحبك اللي هيديك حاجات وعمره ماهيسألك على حاجة في المقابل.. انت لما تقرا كتاب و تخلصه مش هتبقى نفس الشخص اللي بدأه.. هتكسب حاجات كتير من الكتاب ده .. الكتاب هو اللي لما تبقى قاعد معاه مش هيتكلم كتير و يصدعك هيتكلم زي ما أنت عايز ..لما تفت...

هتبدأ منين ؟.. ناس.. مكان ..صورة قديمة ..ورق ..رسالة ..أغنية..وهكذا كل الحاجات دي ممكن تكون فيها ذكريات .. الذكري هي حاجة حصلت زمان ..سواء كانت حلوة أو وحشة المهم إنها ذكرى .. ذكريات ممكن تكون بسيطة بس بتفرًحك .. مكان قديم عيلتك بتتجمع فيه ..أو جواب كان واحد صاحبك كاتبهولك وانتم صغيرين لما تتفرج على مسرحية أو فيلم قديم إنت بتحبه و كنت بتتفرج عليه وإنت صغير حاجات بـمجرد ماتفتكرها تلاقي نفسك بـتضحك وإنت مش حاسس العكس بيحصل ..تفتكر ذكريات تخليك حزين ومتضايق .. حد عزيز عليك توفى عشت معاه أيام جميلة وغالبا يبقى  جدك أو جدتك صاحبك اللي سابك و كنتم في يوم بتقولوا على بعض 'BestFriends' خطوبة اتفشكلت...أيام زمان عامةً ..لما كنت بتبقى حاسس فعلا بالأمان ..  حاجات تخليك تدًمع.. بس الحقيقة إن الذكريات بتخليك الحالتين في نفس الوقت .. عشان إنت لما بتفتكر الذكريات الحلوة ..بتبقى مبسوط لما تفتكر اد إيه فرحان ساعتها .. بس بتزعل جواك ..عشان الوقت ده خلاص ..خلص وبقى ذكرى بتفرح لما تشوف شكلك في الصورة وإنت صغير وشباب ..عشان ماكنش فيه مسئوليات وبتزعل لما بتبص في المراية ....

من أول يوم بدأت أكتب فيه كنت قررت إني مش هاكتب في حاجتين.. السياسة والدين .. السياسة  الكلام فيها في الأيام ديه بقى يحَزن .. بقى كل واحد برأي ومحدش عارف الحقيقة فين .. أما الدين .. فـ أنا عارفة إن أكيد ناس مسيحين بيقروا الكلام ده .. وبما إني مسلمة والحمد لله ف أنا هاكتب عن  الاسلام ... وأكيد المسيحيين مش هيقروا بس بما إننا داخلين  على شهر رمضان .. ف أنا اعتذر للمسيحيين عشان أنا مش هأقدر امنع نفسي من الكتابة عن الشهر ده .. وان شاء الله  بعد ما انتهي من الكتابة عنه .. هارجع تاني أكتب  متفرقات.. أيام تفصلنا عن شهر الصيام .. بس هو مش شهر الصيام بس .. شهر الصيام والقرآن والتراويح والتهجد ... شهر الزينه واللمه وكل الحاجات الحلوة .. بس للأسف الحاجات الحلوة ديه بتختفي سنة بعد سنة .. حتى  هتلاقي ناس كتير بتقول ..' رمضان مبقاش زي زمان ' ' الفرحة مبقتش زي الأول ' تفتكر رمضان هو اللي اتغير ؟..  ولا احنا اللي اتغيرنا ؟ تفتكر احنا جاهزين لرمضان ؟ عامةً هنشوف الكلام ده في قصة قصيرة من وحي خيالي  .. بس لو تسمحولي مش هاكتبها كلها مرة واحدة بس أحب اعرفكم على طب...

-هادخل علمي رياضة ولا علمي علوم ..؟ - هادخل كلية إيه ؟ -هاشتغل في شركة إيه ؟ - أسافر ولا لأ ؟ كلها اسئلة محتاجة منك قرار هتاخده .. بس كل قرار لازم هيعدي بـتلات مراحل .. أول حاجة مرحلة ماقبل القرار .. تفكير رهيب .. بتفكر وإنت خارج مع عيلتك ومع اصحابك .. بتفكر قبل ما تنام وأول ماتصحى عمًال بتقلبها في دماغك .. طب أعمل كذا؟.. طب اختار إيه ؟ وممكن تقعد ع الحال ده شهر بعد كده.. تاخد القرار .. وهي ديه المرحلة التانية .. إنك تقتنع بالحاجة اللي إنت كنت بتفكر فيها بقالك شهر ..  تقتنع بالحل اللي إنت حطيته للسؤال اللي كنت بتدورله على إجابة .. تالت حاجة .. وأهمهم .. الفعل خلاص فكرت ورتبت .. واخذت القرار .. عملت إيه بقى عشان توصل للي إنت قررته مثلا إنت قررت إنك عايز تدخل كلية الطب .. تمام .. عملت إيه بقى ؟.. ذاكرت ؟ ركزت وإنت قاعد في الدرس ؟ صورت ورق ؟ تعبت عشان تدخلها ؟ بص كده .. الفزورة  ديه كان كاتبها ابراهيم الفقي -رحمه الله - -كان فيه تلات طيور ع الشجرة .. قرر طائر منهم أن يطير ..فكم  طائر بقى على الشجرة ؟ وكانت الإجابة تلاتة .. عشان مكتوب إن الطائر ق...

(تخيل في دماغك الحوارين اللي جايين ..) الأول إتنين بيتكلموا بعصبية -مالك يا عم ؟ - مش شايف إن سيادتك اتأخرت وأنا واقف مستنيك!!  - لأ أنا متأخرتش أنا جاي في معادي! - يا عم إيه الكدب ده  إنت جي إتنين ونص!! ..إنت هتحور عليَّ ؟ -  بقولك انا جي إتنين!  - آه أصل أنا أعمى و غبي ومبفهمش في الساعة .. يا عم روح أنا غلطان إني رديت عليك  _______________________ التاني إتنين بيتكلموا عادي -مالك يا عم ؟ -مفيش متضايق بس شوية عشان أنت اتأخرت  -أنا متأخرتش أنا جاي في معادي  - مش احنا كان معادنا الساعة اتنين برضه؟ -أيوه  -وإنت جيت الساعة كام ..؟ - ..أصل المواصلات كانت زحمة واللهِ  - يعني جيت الساعة كام ؟ - إتنين ونص  - يعني اتأخرت.. - ايوة اتأخرت ..متزعلش مني أنا اسف  - مفيش مشاكل يا معلم  __________________________ في الحوارين إتنين صحاب بيتكلموا .. في الحوار الأول الاتنين  مضايقين من بعض .. وغالبا هيفضلوا كده كام يوم .. في الحوار التاني الإتنين قضوا يوم عادي ولا كإن  حاجة حصلت .. الفرق في إيه ؟ .....

ليه بقى عادي ؟ ليه بقى اليوم عادي؟ ..و الحاجات اللي حواليك عادية ؟..وليه الناس بقت عادية ؟ الايام بقت شبه بعض.. روتين .. كل يوم تصحى تقعد علي النت .. تاكل ..تنزل ..ترجع ..تقعد علي النت تنام .. وهكذا .. أكيد طبعا مش كل الناس بتعمل كده .. بس هتلاقي اليوم بيتكرر ايا كان اللي إنت بتعمله .. مفيهوش جديد .. اليوم عادي ........... بقى عادي إن الناس ترمي في الشارع .. لأ على فكرة مش عادي .. لو إنت شايفه عادي تبقى اتعودت بقى عادي إنك تلاقي الشباب واقفين يحششوا في الشارع  وإنت ماشي جنبهم عادي ..حصلت معايا .. بقى عادي إن الابن يعلي صوته على أمه.. الحاجات ديه مش عادية .. بس عشان احنا بنشوفها كتير .. خلاص بقينا نقول عادي .. الناس بقيت عادية ..  أول ماحد يتخرج .. يبقى مليان أحلام والطموح ماليه.. وبعد كده يتصدم بالعالم اللي حواليه .. ويقرر إنه يبقى عادي .. طب فين الأحلام؟ فين المشاريع ؟ فين الكلام اللي كنت بتقوله أيام الكلية وإنك هتبقى مهندس ناجح وتعمل شركة لنفسك وتعمل مشاريع  .. ها فين كل ده ؟ ف الزبالة... وينتهي بيه الحال .. إنه يبقى سكرتير .. مساعد مهندس .. أو إنه ...

مش هقولك ربنا خلق لك أذنين عشان تسمع أكتر ماتتكلم .. ومش هقولك إذا كان الكلام من فضة فالسكوت من دهب .. أنا هحكيلك قصة سمعتها من كام يوم .. شاب اسمه جون ..بيبع عصير للسائحين في جزيرة وكل مايبيع لحد عصير يسأله "مبسوط في المكان اللي أنت نازل  فيه ؟" ويسمع ردهم .. فيه اللي يقول له "لأ عشان الملايات مش نظيفة " واللي يقول له "لأ عشان الأكل مش كويس " "لأ عشان الخدمة مش حلوة "واللي يقول  "أيوه مبسوط و اكتر حاجة عجباني موقعه "  وهكذا .. بدأ جون يكبر شغله وعمل محل عصير .. و برضه يسأل السائحين "مبسوطين؟" وكان بيكتب الكلام اللي بيسمعه من السائحين ..سواء كان حلو أو وحش  بعد سنين كبر جون الشغل أكتر وفتح مطعم .. وبرضه كان بيعمل نفس الكلام .. ويكتب اللي بيسمعه عارف مين جون ده ؟ ده جون ماريوت ( John marriott ) ..   صاحب الفنادق الشهيرة في العالم  ..فنادق ماريوت بدأ وهو شاب يسأل الناس عشان كان حلمه إنه يعمل احسن فنادق .. بعد ماعمل المطعم وكسب فلوس اكتر بدأ يفكر في الفنادق اللي بيحلم بيها .. وبدأ بفندق .. كان صغير بس كان مختلف ....

حاجات صغيرة قوي ممكن الواحد مايخدش باله منها .. مع إنها مهمة قوي .. حاجات ممكن تفرق مع ناس كتير حواليك وإنت مش واخد بالك .. في  حاجات صغيرة  ممكن تخلي واحد يقولك .. إنت أكتر واحد فرحني النهاردة وفي حاجات تانية ممكن تخلي واحد ينام معيط .. لو جربت تقول كلمة حلوة لحد .. مش مجاملة أو كدب بس كلمة تبسط بيها اللي  قدامك زي مثلا لما تبقى عارف إن أمك واقفة في المطبخ من الصبح وإنت جاي من النادي جعان وتلاقي الأكل متحضر .. جرب تقولها .. إيه الأكل الحلو ده .. تسلم ايديكي يا أمي صدقني هتفرق معاها كتير لو جربت تدخل على مراتك ببوكيه ورد من غير مناسبة بس عشان هي قاعدة طول اليوم في البيت أو شغالة طول النهار .. هتلاقي فرحة على وشها  يمكن مشفتهاش من زمان لو قفلت  موبيلك أو  سيبته  عشان إنت عارف إن صاحبك مبيحبش  اللي قاعد معاه يبقى  ماسك الموبيل طول الخروجه هيحس بإنك مهتم بيه  وهيبقى مبسوط طول الخروجه ويمكن بعديها كمان .. كل الحاجات الصغيرة ديه ممكن تخلي اللي حوليك مبسوطين  .. بس عارف إن  ممكن كلمة واحدة  تتقال بهزار  تضايق جدا .. عارف ...

عمرك فكرت  ممكن الكفيف يكون بيشوف إيه ؟ مش قصدي على النظر .. قصدي على الأمور عامة حوار مع كفيف : - ازييك النهاردة تمام ؟ - الحمدلله - ممكن اعرف إنت شايف الأمور حواليك إزاي ؟ - بصي .. ناس كتير بتنسى  نعمة البصر ..مع إنها من أهم الحاجات اللي ربنا  اعطاها للإنسان ..بس مش كل الحاجات اللي حولينا محتاجة إنك تشوفيها -إزاي ؟ - يعني إنتي  مش بتشوفي بس بعينيكي .. بتشوفي كمان بعقلك وبقلبك .. وساعات كمان ممكن تشوفي بعقلك وقلبك بس ..ناس كتير مش عارفة الكلام ده .. أبسط مثال إنك لما بتعرفي ناس جديدة.. أول حاجة بتفتكريها .. (متحكمش على الناس بالمظاهر) .. يعني ماتستخدميش عينيكي بس في إنك تعرفي اللي قدامك عشان المظهر مش هيقولك على طبيعة أو شخصية اللي قدامك .. لازم تستخدمي الحاجتين التانيين ..ومينفعش  تحكمي بواحد منهم .. -ليه ؟ - عشان لو استخدمتي عقلك بس .. ممكن تكوني قاسية في حكمك  ولو قلبك بس .. هتكوني طيبة بزيادة ..ولازم تعرفي إن مش كل الناس هتعرفي تحكمي عليهم وتعرفي حقيقتهم .. بس هتيجي مواقف هتبين اللي جوه اللي قدامك .. ساعتها هتعرفي  حقيقتهم إيه..ول...

- ورانا شغل كتير هنعمل إيه ؟  - نشد حلنا وان شاء الله هنلحق  -بس لازم نسلم الملف ده بلليل و حاسس إننا مش هنلحق  - ياعم ماتقولش كده .. يلا نكمل بس  _________________ لأ الراجل ده مش بيكلم زميله في الشغل  ..ده بيكلم نفسه أيوه بيكلم نفسه .. مش مجنون .. بالعكس ممكن يكون اعقل من ناس كتير مش بتكلم نفسها في ناس عايشة وعندها خمسين سنة ومش عارفة فيه جواها إيه .. ليه ؟ هاقولك ليه.... عشان هم عمرهم ما قعدوا مع نفسهم بعد  موقف وسألوها اللي هم عملوه صح ولا غلط عشان  عمرهم ما ساعدوا نفسهم عشان عمرهم ماحبوا نفسهم وعرفوها وعمرهم ماصحبوها حاجة مهمة إنك تبقى عارف جواك في إيه .. عشان إنت لما تعرف نفسك هتعرف ممكن تستحمل اد إيه .. هتبقى عارف ممكن تشتغل اد إيه واخرك هيبقى فين عشان كده لازم  تقعد معاها .. لوحدك .. معاها هي بس ..وتكلمها فيها إيه لو جربت تعزم نفسك على الغدا .. أو تجيب لنفسك حاجة كان نفسك فيها كمكافأه لنفسك  بعد أسبوع شغل طويل أو أسبوع الامتحانات مثلا مش عشان إنت وحيد أو عشان مش لاقي حد يعزمك .. بس عشان إنت  هتبقى  أكت...

الشهرة هي مغامرة .. واللي عندهم أمل بس هم اللي بيغامروا.. مش عيب لما يبقى نفسك تبقى مشهور.. كاتب مشهور أو رسام مشهور أو مهندس مشهور  أو ..أو    مشهور في الحاجة اللي أنت بتحبها .. بس العيب إنك تبقى عايز تكون مشهور  عشان  تتكبر علي اللي حواليك و متساعدهمش مش عيب إنك تبقى عايز تكون مشهور عشان الناس يفتكروك ويعرفوك ..وكمان يدعولك لما تموت ... بس العيب إنك تفتكر نفسك باقي على طول وتنسي إنك بتحط لمسة غيرك هيجي بعديك يطورها ويمكن يغيرها خالص مش عيب إنك تبدأ شهرتك بفكرة ..أصل كله بدأ كده .. بدأ من الصفر و من  تحته كمان ..  بس العيب إنك بعد ماتتشهر ..تنسى الصفر اللي إنت كنت فيه .. هتلاقي ناس بتشجعك  وناس هتحبطك وناس هتقف تتفرج عليك من بعيد .. عشان لما تنجح يقولك  "أنا كنت حاسس إنه فيه موهبة " الناس اللي هتشجعك  دول اعرف انهم مليانين امل وانهم في يوم من الأيام كانوا زييك .. أو هم لسة زييك .. جواهم أفكار ونفسهم ينفذوها .. وميعرفوش حاجة اسمها مستحيل .. الناس اللي هتحبطك .. حول سلبيتهم اجابية ..اكنهم بيتحدوك .. وإنت هتثبت لهم .. إنك ان شاء الله تقدر...

البداية منين.. دايما مش بنبقى  عارفين  البداية منين  ؟ بتبقى مستني اللي قدامك يفتح الموضوع اللي أنت عايز تكلمه  فيه  عشان إنت بس مش عارف البـداية فين .. يا تري مين اللي هيبدأ ..   سؤال بتسأله لنفسك ..كأنك مستني اللي قدامك يبدأ بس بكلمة وإنت هتكمل الموضوع وتحكي .. مش  بس في  الكلام .. في كل حاجه أنا من زمان بحب القراءة ونفسي أكتب مدونات ..بس ماكنتش عارفة .. ماكنتش عارفة هبدأ منين  .. افرضي الكلام معجبش حد ؟ .. افرضي معرفتش اكتب عن موضوع وكل شوية اعيد الكلام ؟ اسئلة  بسألها لنفسي ... فـمنين أبدأ ... استنى حد يجي يشجعني ؟ .. مين ؟ طب ما أنا لو قلت لحد ممكن  يحبطني .. فـ أنا قررت إني ابدأ  بنفسي وأشجعها ..وأكيد كلامي مش هيعجب كل الناس .. بس أهم حاجة إني اكون نفسي  .. وإنت كمان ابدا بنفسك .. ومتقولش كلام تضحك بـيه على اللي حواليك وعلى نفسك ... خلي البداية دايما عندك  :)